IS jy dalk iemand wat nie regtig lief is daarvoor om te lees nie? Met springmielies in die een hand en 'n Coke in die ander hand is jy in jou element. Tog voel jy jy het iets meer voedsaam nodig as 'n paar pitte wat in 'n kits in die mikrogolfoond warm gemaak is. Iets waaraan jy kan kou. Vaste kos. Behalwe vir al die films wat 'n Christelike grondslag het, is daar ook 'n paar ander DVD's op die rakke wat spesiaal vir jou bedoel is. Nee, dis nie Jamie Oliver se kookboeke nie! Dis geestelike kos wat jy nodig het om die hand van God raak te sien, te groei in jou geloof en te verstaan wat ons as mense werklik in die oë van ons Skepper is.

Louis Giglio het hierdie leemte raakgesien. Saam met sy span by The Passion Conference en 268generation het hy 'n paar DVD's vrygestel in 'n taal wat enigiemand kan verstaan en wat suiwer oor God se grootheid handel. Saam met duisende jongmense wie se lewens al deur sy boodskappe aangeraak is, kan ek enigeen van sy reekse aanbeveel.

Hier is 'n kort bekendstelling:

Indescribable
Het jy al gewonder hoe groot die hemelruim werklik is? Giglio is nie 'n wetenskaplike nie, maar met die hulp van NASA sit hy dit bietjie om in woorde wat ons kan verstaan. Glo my dis groot. Maar wat is sy rede om dit aan ons te wys? Sodat ons klein kan voel? Nee, sodat ons weet ons is klein. Sodat ons kan sien hoe groot die heelal is en tog hou God alles in sy handpalm. Die groter gedagte wat Giglio by ons wil tuisbring, is die feit dat selfs al is God onverstaanbaar groot en almagtig, is ons wat so klein is, uiters belangrik vir Hom.

How Great Is Our God
'n Opvolg op Indescribable. Hierdie is seker die boodskap wat die grootheid van God die beste beskryf het. Met sy beeld "as die aarde 'n gholfbal was" vergelyk hy dit met vyf van die grootste sterre waarvan ons weet. Daar is ook 'n draaipunt in sy boodskap – Giglio keer terug na die mens en mikrobiologie. Sy boodskap is dit: God ken ons en het ons wonderbaarlik aanmekaar geweef. En deur die kruis hou Hy ons vir altyd bymekaar.

Alive
Weet jy hoe jy gevorm is? Hoe funksioneer jou liggaam? Hierdie is vrae waaraan ons nie elke dag dink nie, maar tog is dit die vrae wat lei tot 'n besef van hoe wonderlik ons wel geskape is. Ons is wonderwerke wat elke dag plaasvind. Dit is hoe Louis Giglio in Alive die skeppende hande van God benader. Saam met David staan ons in verwondering oor hoe God ons gemaak het. Maar dis nie waar dit eindig nie. Ons liggaamlike geboorte is net die begin van 'n tydelike lewe op aarde, maar 'n geestelike geboorte is die begin van iets wat met niks op aarde vergelyk kan word nie.

Hope: When life hurts most
Wanneer dit sleg gaan, voel ons so maklik dat God nie bestaan nie. Met Hope wys Giglio dat God juis in sulke tye die naaste aan ons is. Dat Hy die anker is wat ons hoop stewig hou, maak nie saak waar ons is nie. En wanneer God ons in daardie hoop herstel, is dit die grootste megafoon om sy glorie mee te besing.

Daar is ook 'n paar ander reekse op pad Suid- Afrika toe. Een daarvan is History waar Giglio koppe bymekaar gesit het met die bekende outeur en leraar, Andy Stanley. Giglio som die reeks eenvoudig op: "History is truly His story."

Springmielies enigiemand? Of is jy gereed vir vaste kos?