>>Nuwe Uitgawe<<

Red@Kruispad

Hallo almal,

Nee kyk, met hierdie koue wat ons die laaste ruk gehad het, weet mens goed dat die winter hier is. Hopelik is ons oor die ergste koue en die goeie nuus is dat die lente en somer binnekort op pad is.

Van hierdie uitgawe af gaan Kruispad ongelukkig net kwartaalliks verskyn. Maar ons belowe om steeds propvol lekkerleesartikels, en kraakvars nuus en gebeure te wees. As jy bekommerd is dat jy lanklaas iets van Kruispad gehoor het, kan jy altyd by ons inloer op ons webblad www.kruispad.net of by ons facebook-groep aansluit en daar jou stem dik maak.

Ons het verlede keer – met die Noag-uitgawe – met 'n nuwe reeks begin. In hierdie reeks wil ons graag na figure uit die Bybelgeskiedenis kyk. Wie was hulle, wat het hulle gedoen en ook wanneer het hulle geleef? Om jou te help hiermee, word ons middelblad gebruik om 'n tydlyn saam te stel. Aan die einde van die reeks kan jy al die tydlyne aanmekaar las om so 'n idee te kry van hoe die Bybelgeskiedenis nou eintlik verloop het. As jy dalk een van die tydlyne mis, kan jy dit op ons webblad gaan aflaai en print, of dit selfs gebruik as 'n background vir jou rekenaar.

Nou ja, Aartsvaders … Wat beteken dit nou eintlik? Die Aartsvaders was die eerste manne – Abraham, Isak en Jakob – uit wie se nageslag Jesus uiteindelik gebore is. In hierdie uitgawe gaan ons bietjie na dié drie manne kyk en na die spesiale verhouding wat hulle elkeen met God gehad het.

Ek hoop dat jy die Aartsvaders-uitgawe sal geniet. Laat weet ons gerus indien jy enige vrae of kwessies het waaroor jy graag meer in Kruispad sal wil lees.

Tot volgende keer,

Maureen
Soli Deo Gloria!