Kruispad.net - Sending

>> Sending <<

Artikel: Islam
Skrywer: Juanita Swanepoel & Rineé Viljoen
Uitgawe: 9

SENDINGHULP | GEOPENDE DEURE

Al ooit gewonder waar die Islamitiese geloof nou eintlik vandaan kom of wie die belangrikste figuur in dié geloof is, Mohammed of Allah?

Islam is die vinnigste groeiende geloof ter wêreld en een waarvan ons, as Christene, nie genoeg weet nie. In vandag se samelewing volg 21.01%* van die wêreld se bevolking hierdie geloof en deur oningelig hieroor te wees, laat ons te veel geleenthede verbygaan waar ons die Goeie Nuus kon verkondig. Kom ons kyk bietjie waar die geloof vandaan kom en waarin hulle glo.

Volgelinge van Islam staan as Moslems bekend en volgens die Koran (die Moslems se bron van teologie) word Islam so ver in die geskiedenis teruggevoer as Rubriek verskaf deur Geopende Deure die Ou-Testamentiese Abraham, die vader van die gelowiges. Volgens die Koran was hy ook die eerste Moslem. Die Moslems wys daarop dat hulle deur sy oudste seun, Ismael – die seun van Hagar – met Abraham skakel, terwyl die Christendom deur die jonger seun, Isak – die seun van Sara – met Abraham verbind is. As 'n mens die lyn van Ismael volg, kom jy glo by Mohammed uit.

Ons kan egter die bestaan van Islam terugvoer na die geboorte van Mohammed (ongeveer 570 n.C. in Mekka). Sy pa en ma is albei vroeg oorlede en hy het op sesjarige ouderdom by sy oupa gaan woon en later, met sy oupa se dood, by sy oom. Hy is op 25-jarige ouderdom met 'n welaf weduwee getroud.

Mohammed was die sentrale figuur in die vestiging van die godsdiens as gevolg van openbaringe wat hy, 'n ongeletterde, gedurende die eerste deel van die sewende eeu n.C. onvang het, en wat na sy dood in een boek, die Koran, versamel is. Islam is 'n godsdiens waarin dié boek 'n baie belangrike rol speel. Hulle beweer dat Mohammed dit direk van Allah af, deur bemiddeling van die engel Gabriël, ontvang het. Later het daar 'n regsisteem en teologie gevolg wat saam met die tradisie 'n Islamitiese beskawing opgebou het.
Wat glo die Islam? (Vergelyk hierdie tabel met die tabel in uitgawe 8.)

* 2007 Statistieke volgens CIA "The World Factbook".
www.cia.gov/library/publications/the-world-factbook/geos/xx.html

	ISLAM (Bron: Geopende Deure) Beteken: "Volledige oorgawe en onderwerping aan die wil van Allah."
Wie is God?	"Daar is geen God behalwe Allah nie." Om enigiets aan God gelyk te stel is onvergeeflik. Die karakter van God word in 99 name uitgedruk.
Bron van teologie	Die Koran is die basis en die grondslag van Islam. Alle Islamitiese beginsels en voorskrifte berus op die Koran. "Hierdie Boek, waarin geen twyfel is nie, is 'n rigsnoer vir die getroues," (Sura 2.2). Die Koran is die eerste bron, die Sunnah is die tweede bron – dit verduidelik die Koran.
Spesifieke hoofleier van die kerk op aarde?	Daar is geen menslike leier op aarde nie.
Wat glo hulle van sonde?	1. Elke mens is sondeloos sonder 'n sondige natuur. 2. Sonde is bloot 'n verbreking van Allah se wet (Sura 7.33). 3. As Allah wou, kon hy die mens verhoed om te sondig (Sura 32.13; 13.31). 4. Sonde grief Allah nie, want hy is te groot om daardeur geraak te word. Allah skep die mens se bose dade en die mens moet dit doen (Sura 37.96; 54.49). 5. Goeie dade word met slegte dade in die weegskaal gebalanseer. Indien goeie dade swaarder as slegte dade weeg, mag dit help dat Allah vergifnis gee. 6. Allah vergewe slegs wie hy wil en straf dié wie hy wil (Sura 3.124; 5.118). Moslems het geen sekerheid oor sondevergifnis nie.
Metode en praktyke van verlossing	Die basiese vereiste om 'n Moslem te word, is om die belydenis "Daar is geen god behalwe Allah nie, en Mohammed is die apostel van Allah" uit te spreek. Die vyf pilare van Islam (Elke Moslem moet dit volgens sy denominasie uitvoer): 1. Shahada – Geloofsbelydenis; 2. Salat – Bid vyf keer per dag; 3. Zakah – Verpligte Aalmoese; 4. Sawm – Vas gedurende Ramadan 5. Hajj – Pelgrimstog na Mekka.
Wat gebeur na die dood?	1. Vooruitbeskikking van God (Sura 14.4). Wat God beskik is beskik. 2. Die krag van alle aksies (goed of sleg) kom van Allah, maar die mens is tog verantwoordelik vir sy dade. 3. Die oordeelsdag (Sura 2.62) is 'n dag wat die meeste Moslems vrees. 4. Elke Moslem se goeie en slegte dade sal in 'n skaal geweeg word, wat sy eindbestemming gaan bepaal.
Is Allah, die god van die Moslems, en die Drie-enige God van die Christene dieselfde God?	NEE, " … Julle mense van die Bybel! … moenie oor God dinge sê wat nie waar is nie. Werklik Christus Jesus, die seun van Maria, was net 'n boodskapper van God en sy woord … Glo dan net in God en sy boodskappers en moenie sê: 'Drie' nie," (Sura 4.170-171).

Stuur gerus 'n epos na sending@kruispad.net met enige vrae of opmerkings.