Hoe gebruik predikante die oorspronklike Bybeltale?

Het jy al gewonder hoekom predikante die oorspronklike tale van die Bybel bestudeer? Ds. Werner Brotherton vertel ons hoe dié brontale gebruik word.

Het jy al gewonder hoe ’n predikant te werk gaan om ’n preek te skryf? Die proses om ’n preek te skryf noem ons eksegese. Om presies te wees, die Gereformeerdes gebruik die grammaties-historiese eksegese-metode. Dit beteken dat wanneer ’n predikant begin met ’n preek, of dan begin met sy eksegese, is deel van sy werk om na die brontale waarin die Bybel geskryf is te gaan kyk. Hierdie tale is soos volg: Die Ou Testament is geskryf in Hebreeus en op ’n paar plekke in Aramees. Die Nuwe Testament is in Grieks geskryf.

Waarom is dit belangrik dat ʼn predikant na hierdie tale gaan kyk?

’n Predikant moet na hierdie tale gaan kyk sodat hy by die bedoeling van die teks kan uitkom. Hierdie tale werk anders as ons tale. Hebreeus, Aramees en Grieks het nie net drie tye soos wat ons in Afrikaans het nie. Woorde in hierdie tale het sekere verbuigings (daar word letters voor of agter ’n woord gevoeg) wat die betekenis heeltemal anders maak.
’n Woord in die brontale het meestal ook meer as een betekenis wat dit nóg moeiliker maak. Daarom is dit werklik belangrik dat ’n predikant teruggaan na hierdie tale toe wanneer hy met ’n teks werk. Dit is veral belangrik wanneer hy agterkom dat die verskillende vertalings van die Bybel groot verskil oor ’n sekere woord of term.
Wat vir ons duidelik moet wees is hoe belangrik dit is dat ’n predikant besig is met die brontale. Dit is ook deel van die rede waarom ’n predikant so lank moet studeer, sodat hy hierdie tale onder die knie kan kry.

Wat beteken dit vir my as lidmaat wat nie die brontale magtig is nie?

Kan ek dan nog die Bybel verstaan? Natuurlik! Die Bybel is juis vertaal sodat ons dit kan verstaan. Dit is baie goed om na verskillende vertalings in Afrikaans en Engels te kyk wanneer jy sukkel om ’n gedeelte te verstaan. Wanneer iets steeds onduidelik is kan jy jou predikant gaan vra vir hulp. Daar is deesdae ook baie oulike toepassings op ons rekenaars en slimfone wat ons kan help met die brontale. Dit is nie so goed soos om die ware Jakob te kan leer en lees nie, maar dit kan ons help.

Waarom al die moeite met die brontale?

Ons moet bly by die brontale omdat ons so na as moontlik aan die bedoeling van die teks wil bly. Die brontale help ons om nie die sentrale punt van ’n gedeelte te verloor en ons eie stories en afleidings te maak nie. Om te kan teruggaan na die brontale toe is ’n seën uit God se hand. Dit is alleen deur Sy werk dat die brontale behoue gebly het.