Wie stap saam met jou?
Die mense met wie jy die meeste tyd deurbring, vorm jou karakter, jou keuses en selfs jou geloof. Daarom sê Spreuke: Kies jou vriende met wysheid.
Het jy al opgelet hoe baie mense mettertyd soos hulle honde begin lyk? Of dalk is dit die honde wat soos hulle eienaars begin lyk! Hoe dit ook al sy, mense lag al jare lank daaroor. Daar is selfs navorsing wat wys dat mense dikwels honde kies wat op een of ander manier by hulle pas.
As dit met ’n hond kan gebeur, hoeveel te meer met die mense saam met wie ons elke dag leef?
Ons word soos die mense rondom ons
Ons dink graag ons bly dieselfde, maak nie saak saam met wie ons tyd deurbring nie. Maar die waarheid is dat mense op mekaar afvryf. Ons neem mekaar se gewoontes oor, begin dieselfde grappies vertel, en praat soos die mense rondom ons. Ons sien die wêreld deur hulle oë. Selfs ons geloof word beïnvloed deur die mense aan wie ons die naaste is.
Daarom sê Spreuke 13:20:
Wie met wyse mense omgaan, kry self wysheid; wie hom met dwase ophou, word self sleg.
Jou vriendekring bepaal jou rigting
Hierdie vers gaan nie net oor kennis nie. Dit gaan oor die rigting waarin jou lewe beweeg. As jy jou omring met mense wat God liefhet, wat eerlik leef en wyse besluite neem, sal dit jou ook vorm. Maar as jy voortdurend luister na mense wat God ignoreer, roekeloos leef of verkeerde waardes nastreef, sal dit mettertyd ook sy merk op jou laat.
Dit beteken nie dat ons onsself van ongelowiges moet afsonder nie. Jesus het immers tyd saam met tollenaars en sondaars deurgebring. Hy het hulle liefgehad en na hulle uitgereik. Die verskil is dat Jesus hulle beïnvloed het; Hy het nie toegelaat dat hulle Hom vorm nie.
Wie kry toegang tot my hart?
Die vraag is dus nie met wie jy in aanraking kom nie, maar eerder: Wie se mening dra die meeste gewig wanneer jy besluite neem? Wie beïnvloed jou manier van praat en bepaal wat vir jou belangrik is? Is daar iemand wat jou help om nader aan God te leef?
Kies jou vriende met wysheid
Spreuke 12:26 sê: “Die regverdige laat sy pad vir hom wys deur ’n vriend …” Dit klink amper vreemd in ’n wêreld waar ons dink vriendskap gebeur sommer vanself. Maar die Bybel leer dat vriendskap ook wysheid vra. Nie omdat ons hoogmoedig of eksklusief moet wees nie, maar omdat ons weet hoe groot invloed ander mense op ons het.
Dink aan ’n vuur. As jy ’n stuk hout tussen warm kole sit, begin dit self gloei. Maar haal jy die hout uit en sit dit in die reën, doof dit stadig uit. So werk dit ook met ons geloof. Die mense rondom ons kan ons aanmoedig om warmer vir die Here te leef, of hulle kan die vuur stadig laat doodgaan.
Dit is waarom Spreuke ons telkens waarsku oor verkeerde invloede. “As sondaars jou wil verlei, my seun, moenie toegee nie,” (Spreuke 1:10). En weer: “Moenie agter die goddeloses aanloop nie, vermy die pad van slegte mense,” (Spreuke 4:14). God wil nie ons vreugde beperk nie. Hy wil ons beskerm.
Wees ook iemand wat ander nader aan Christus bring
Dalk is dit tyd om eerlik na jou vriendekring te kyk. Nie om mense te veroordeel nie, maar om jouself af te vra: Word ek nader aan Christus gelei deur die mense saam met wie ek die meeste tyd deurbring? Help hierdie vriendskappe my om wyser, liefdevoller en gehoorsamer aan God te leef?
En dan is daar nog ’n vraag wat net so belangrik is: Sou ander mense sê dat hulle nader aan Christus leef omdat hulle tyd saam met my deurbring?
Dit is uiteindelik God se bedoeling met vriendskap. Nie net dat ons goeie maats sal hê nie, maar dat ons mekaar sal help om meer soos Christus te word.
Kies daarom jou vriende met wysheid. En leef só dat iemand anders eendag kan sê: “Ek het Jesus beter leer ken omdat ek saam met jou gestap het.”
