Help jou vriende jou geestelik groei?
God gee nie vir ons vriende net vir geselskap nie. Hy gebruik hulle om ons geloof te vorm en ons al hoe meer soos Christus te maak.
God gebruik vriende om ons te vorm
Waarom gee God vir ons vriende? Ons antwoord gewoonlik: vir geselskap, ondersteuning en lekker saamkuier. Dit is alles waar. Maar Spreuke wys ons op nog ’n rede: God gee ook vir ons vriende vir geestelike groei.
Yster slyp yster, en een mens slyp die aard van ’n ander.
Spreuke 27:17 (2020-vertaling)
Wanneer twee stukke yster teen mekaar skuur, gebeur daar iets. Die proses is nie altyd maklik nie. Daar is weerstand, wrywing en selfs ’n paar vonke. Maar die eindresultaat is dat albei skerper word.
Dit is die beeld wat Spreuke 27:17 gebruik. Ware vriendskap gaan nie net daaroor om mekaar goed te laat voel nie. Dit gaan daaroor om mekaar te help om meer soos Christus te word.
Die vriend wat jou aanspreek wanneer jy afdwaal
Ons hou daarvan om mense rondom ons te hê wat altyd met ons saamstem. Maar ’n vriend wat jou nooit aanspreek nie, is nie noodwendig ’n goeie vriend nie.
Spreuke 27:5-6 sê:
’n Openlike teregwysing is beter as liefde in die geheim. Die wonde deur ’n geliefde toegedien, word opreg bedoel, maar oordrewe is die soene van iemand wat haat.
Ware vriende kyk nie stilweg hoe iemand afdwaal nie. Hulle praat, nie om te veroordeel nie, maar omdat hulle liefhet. Dit verg moed om die waarheid te sê. Dit verg ook nederigheid om dit te hoor.
Natuurlik moet ons dit met sagmoedigheid doen. Ons doel is nooit om iemand af te breek nie, maar om hom of haar weer op die regte pad te help.
Die vriend wat saam met jou bid
Geestelike vriendskap eindig nie by goeie raad nie. Soms het ’n vriend nie antwoorde nodig nie. Hy het iemand nodig wat saam met hom voor God buig.
’n Ware vriend dra jou nie net in sy gedagtes nie, maar ook in sy gebede. Hy herinner jou aan God se beloftes wanneer jy dit self nie meer kan raaksien nie. Hy help om jou laste te dra, soos Galasiërs 6:2 ons leer.
Sommige van die kosbaarste oomblikke in ’n vriendskap gebeur nie om ’n braaivleisvuur of ’n koffietafel nie, maar wanneer twee gelowiges saam bid.
Die vriend wat jou aanmoedig om te groei
Yster slyp yster. Dit maak nie die yster mooier nie. Dit maak dit skerper.
Net so help ’n goeie vriend jou om te groei in geduld, liefde, geloof en gehoorsaamheid aan God. Hy moedig jou aan om aan te hou wanneer jy moedeloos raak. Hy vier saam met jou wanneer God in jou lewe werk. Hy herinner jou aan jou roeping wanneer jy dit vergeet.
Sulke vriende is ’n geskenk van God.
Vir wie help jý om te groei?
Ons vra maklik: “Wie help my om geestelik te groei?” Maar dalk is die belangriker vraag: Vir wie help ek groei? Is daar iemand wat nader aan Christus leef omdat jy deel van sy of haar lewe is?
God gee nie net vir ons vriende sodat ons die pad makliker kan stap nie. Hy gee hulle sodat ons mekaar kan vorm, aanmoedig en help om al hoe meer soos Jesus te word.
Dít is die soort vriendskap wat Spreuke beskryf.
