Laat die Hemelvaart jou lewe lei
Jesus het gekom, gesterf, opgestaan en opgevaar. Hy regeer! Wat beteken dit vir jou lewe vandag? Lees hier.
Daar is tye wat ons wonder: Waar is Jesus nou? Hy het opgestaan, ja. Maar wat nou? Is Hy ver? Is Hy afwesig? Wat is Hy besig om te doen? Die Hemelvaart help ons om hierdie vrae te antwoord. Dis nie ’n nuwe vraag nie. Die dissipels het ook daarmee gesit. Wat nou? Jesus is nie meer soos voorheen by hulle nie.
In Handelinge 1 lees ons hoe Jesus voor sy dissipels opvaar na die hemel. Dis nie net ’n afsluiting van sy tyd op aarde nie. Dit bring duidelikheid. Dit neem misverstande weg. En dit wys vir ons: Jesus het opgestaan, en Hy regeer vanuit die hemel.
Jesus is nie meer op aarde nie, maar Hy werk steeds
Die Hemelvaart trek ’n duidelike lyn: Jesus was op aarde, en nou is Hy in die hemel. Dit bevestig alles wat ons van Hom glo. Hy het werklik gekom, Hy het werklik gesterf, Hy het werklik opgestaan.
En nou vaar Hy op na die hemel. Nie in die geheim nie, maar voor getuies. Die dissipels sien dit self. En dit gee sekerheid: hierdie Jesus is die ware Verlosser. Hy is nou by die Vader. Maar dit beteken nie Hy is nou afwesig nie. Hy regeer. Hy is besig om sy werk voort te sit.
God se koninkryk is groter as wat ons dink
Die dissipels het nog steeds met een groot vraag geworstel:
Here, is dit nou die tyd dat U die koninkryk vir Israel weer gaan oprig?
Handelinge 1:6
Hulle het nog steeds ’n aardse koninkryk verwag. Iets sigbaar. Iets onmiddellik. Maar Jesus antwoord hulle:
Dit is nie vir julle om die tyd en omstandigheid te weet …
Handelinge 1:7
Met sy Hemelvaart wys Hy duidelik: God se koninkryk werk anders. Dit is nie beperk tot een volk of een plek nie. Dit is nie tydelik nie. En, dit is nie afhanklik van aardse mag nie. Dit is ’n ewige koninkryk.
En dit beteken vir ons iets baie belangrik: God is besig, selfs wanneer ons dit nie altyd sien nie. Sy plan strek verder as ons verwagtinge.
Jy het ’n rol in God se plan
Maar wat nou? As Jesus in die hemel is, wat doen ons hier? Jesus laat geen twyfel nie. Hy sê:
Julle sal krag ontvang wanneer die Heilige Gees oor julle kom, en julle sal my getuies wees …
Handelinge 1:8
Hier is die kerk se roeping. Nie om te sit en wag nie, om net te ontvang nie, maar om te getuig. Ons is deel van God se plan. Ons lewe het doel. En ons doen dit nie alleen nie. Die Heilige Gees gee krag. Hy werk in ons. Hy gebruik ons.
Leef met duidelikheid
Die Hemelvaart help ons om reg te sien:
- Jesus is nie weg nie – Hy regeer
- God se koninkryk is nie aards nie – dit is ewig
- Ons lewe is nie doelloos nie – ons is gestuur
Dit bring vir ons rus. Maar dit bring ook verantwoordelikheid. Ons is nie net mense wat wag vir die hemel nie. Ons is mense wat, hier en nou, met ’n roeping leef.
Die Hemelvaart sê vir ons: Jesus is nie net die Een wat gekom het nie. Hy is die Een wat regeer – nou. Hy sit aan die regterhand van die Vader. En eendag sal Hy weer terugkom. Tot dan leef ons met sekerheid. Met hoop. Met ’n taak.
Verwerk uit ’n artikel van ds Hannes Lee. Lees die volledige artikel hier:
