Die Heilige Gees woon in jou
Party dae voel dit of jy alles self moet dra. Maar Pinkster leer ons anders: God is nie net by jou nie, deur sy Heilige Gees is Hy in jou. Jy is nooit alleen nie.
Selfs as jy glo, selfs as jy bid, kan daar tye wees wat dit voel of God ver is. Daar is dae wat dit voel of jy alles alleen moet hanteer. Jy moet self sterk wees. Self aanhou. Self deurdruk. Maar dis juis hier waar Pinkster alles verander.
God kom nader as ooit
In Handelinge 2 lees ons van ’n besondere oomblik:
Skielik was daar ’n geluid uit die hemel soos dié van ’n geweldige rukwind … Hulle is almal met die Heilige Gees vervul …
Handelinge 2:2, 4
Dit is nie net nog ’n gebeurtenis nie. Dit is ’n keerpunt. Tot op daardie stadium het die dissipels saam met Jesus geloop. Hy was by hulle. Hy het hulle geleer, gelei en bemoedig. Maar nou gebeur iets nog groter.God is nie meer net by sy mense nie. Hy kom woon in hulle.
Nie net vír jou nie — ín jou
Dit is die groot waarheid van Pinkster: God is nie net vir jou nie, Hy is in jou. Deur die Heilige Gees kom God self in die lewe van elke gelowige.
Dit beteken:
- jy glo nie uit jou eie krag nie
- jy staan nie op jou eie nie
- jy leef nie alleen nie
Krag vir die alledaagse
Ons dink soms die Heilige Gees is net vir “groot” dinge – preke, sendingwerk, spesiale oomblikke. Maar Handelinge wys vir ons iets anders. Die Gees gee krag vir die alledaagse lewe.
- wanneer jy moedeloos is
- as jy twyfel
- wanneer jy sukkel om reg te doen
- wanneer jy nie weet wat om te sê of te doen nie
Die Gees werk stil-stil in jou: Hy herinner jou aan God se Woord, Hy lei jou, en Hy gee jou krag om aan te hou.
In swaarkry is jy nie alleen nie
Dit beteken nie die lewe raak maklik nie. Die dissipels het steeds swaarkry beleef. Hulle is vervolg en uitgedaag. Hulle moes moeilike keuses maak. Maar hulle was nie alleen nie. Die Heilige Gees was in hulle.
En dieselfde geld vir jou. Wanneer dinge swaar raak, beteken dit nie God het jou gelos nie. Inteendeel, Hy is nader as wat jy dink.
Hy is nie net ’n Helper van ver af nie. Hy is die Een wat in jou werk, wat jou dra, wat jou deur moeilike tye lei.
Leef bewus van sy teenwoordigheid
Die vraag is nie of God naby is nie. Die vraag is: Leef jy bewus daarvan?
Die Heilige Gees werk deur:
- God se Woord
- gebed
- jou daaglikse lewe
Hoe meer jy na Hom luister, hoe meer begin jy sien hoe Hy werk. Nie altyd dramaties nie, maar getrou.
Jesus leef, en stuur die Heilige Gees
Pinkster wys vir ons iets ongelooflik: Jesus het nie net opgestaan en opgevaar nie. Hy het sy Gees gestuur. Hy het nie sy mense alleen gelos nie.
En daarom hoef jy nie alles self te dra, of alleen deur swaarkry te gaan nie. Jy hoef nie uit jou eie krag te leef nie. God self is by jou. Maar meer nog – Hy is in jou. En dit verander alles.
