Wat leer die Bybel ons oor rassisme?

Ons hoor baie van rassisme om ons. Lees hier wat ons in die Bybel oor verskillende rasse leer, en hoe ons rassisme moet hanteer.

deur ds Johann de Waal

Ons hoor baie oor rassisme in die nuus, op sosiale media en selfs in ons skole. Dit is ’n onderwerp wat mense dikwels kwaad, hartseer of verward maak. Maar wat sê die Bybel oor hierdie saak? Hoe behoort ’n Christen oor rassisme te dink en dit te hanteer?

Wat is rassisme?

Rassisme gebeur wanneer mense glo dat sekere rasse beter is as ander. Dit kan wees omdat hulle dink hulle ras is slimmer, sterker of belangriker. Dit is nie net iets van die verlede nie—dit gebeur steeds vandag in baie vorme. Soms is dit blatant, soos wanneer mense mekaar beledig oor hul velkleur. Ander kere is dit subtiel, soos wanneer sekere groepe nie dieselfde geleenthede kry as ander nie.

Maar waar kom hierdie denkwyse vandaan? Die Bybel leer ons dat God alle mense geskep het, en dat almal waardevol is. Genesis 1:27 sê:

En God het die mens geskape na sy beeld; na die beeld van God het Hy hom geskape; man en vrou het Hy hulle geskape.

Dit beteken dat niemand belangriker is as iemand anders net omdat hulle ’n ander velkleur of agtergrond het nie. Ons is almal mense wat deur God geskape is.

Waar kom rassisme vandaan?

Rassisme is nie iets wat mense van nature het nie. Dit is iets wat mense leer. Baie keer begin dit met vrees vir die onbekende. As ons nie mense van ander kulture of agtergronde ken nie, maak ons aannames oor hulle. Ongelukkig word hierdie aannames dikwels leuens.

Die Bybel wys vir ons dat sonde die eintlike rede vir rassisme is. Nadat Adam en Eva gesondig het, het mense begin om mekaar te haat en teen mekaar te draai. In Genesis 4 sien ons hoe Kaïn sy broer Abel doodmaak omdat hy jaloers was. In Genesis 11 bou mense die toring van Babel, en God verwar hulle tale en versprei hulle oor die wêreld.

Hierdie verstrooiing het beteken dat mense in verskillende groepe en kulture ontwikkel het. Maar net omdat mense verskillende tale, velkleure of gebruike het, beteken dit nie een groep is belangriker as ’n ander nie. Dit is net verskille—nie tekens van meerderwaardigheid nie.

---

Die Bybel se antwoord op rassisme

Die Bybel is baie duidelik dat rassisme verkeerd is. In Handelinge 17:26 sê Paulus:

En Hy het uit een bloed al die nasies van die mensdom gemaak om op die hele aarde te woon en Hy het die vasgestelde tye en die grense van hulle woonplek bepaal.

Dit beteken dat alle mense van dieselfde oorsprong kom—ons is almal afstammelinge van Adam en Eva. Niemand is belangriker as iemand anders nie.

Almal is in sonde ontvang en gebore en het Jesus Christus as hulle verlosser nodig. Iets wat ons as gelowiges van verskil as die humaniste is dat ons nie sê alle mense van alle kulture ewe goed is nie. Nee, ons sê alle mense is ewe sleg, juis omdat ons in sonde ontvang en gebore word.

Nog ’n belangrike vers is Galasiërs 3:28:

Daar is nie meer Jood of Griek nie, daar is nie meer slaaf of vryman nie, daar is nie meer man en vrou nie; want julle is almal een in Christus Jesus.

Jesus het gekom om mense van alle nasies bymekaar te bring. Wanneer iemand tot geloof kom, maak dit nie saak watter ras of kultuur hulle is nie—hulle is deel van God se familie. Dit is eers wanneer iemand in Christus is, deur Hom versoen word dat’n persoon, maak nie saak watse kleur, of kultuur hy is weer goed kan wees.

---

Wat beteken dié antwoord op rassisme vir ons?

Rassisme is ’n probleem wat diep gewortel is in die sondige natuur van die mens. Dit is nie net iets van die verlede nie, maar steeds ’n realiteit in die wêreld waarin ons leef.

Die Bybel leer ons egter dat alle mense na God se beeld geskape is en dat niemand belangriker is of meer waarde het as ’n ander nie. In Christus word ons nie meer deur aardse verdelings geskei nie—Hy bring mense van alle nasies en tale saam as een liggaam in Hom.

Die oplossing vir rassisme lê nie in politieke ideologieë of mensgemaakte pogings nie, maar in die transformerende krag van die evangelie. Ware eenheid en versoening is slegs moontlik wanneer mense deur Jesus Christus met God en mekaar versoen word.

As Christene moet ons dus ons eie harte ondersoek, ons sonde bely, en streef om ander met liefde en respek te behandel, sodat ons die eenheid en geregtigheid van God se koninkryk kan uitleef.

---