Klein mosterdsaad-geloof, groot impak
Die wonder van die evangelie is dat dit met ’n klein saadjie geplant kan word, en dan ’n groot boom word met ’n groot impak! Lees hier meer.
deur Alistair van Heerden
In Matteus 17:20 lees ons die woorde van Christus:
En Jesus antwoord hulle: Deur julle ongeloof; want, voorwaar Ek sê vir julle, as julle geloof het soos ’n mosterdsaad sal julle vir hierdie berg sê: Gaan weg hiervandaan daarnatoe! en hy sal weggaan, en niks sal vir julle onmoontlik wees nie.
Christus leer ons in hierdie vers dat geloof, al is dit so klein soos ’n mosterdsaadjie, in staat is om berge te versit.
Die fokus van hierdie beeld is nie die sterkte van die gelowige nie, maar die lewenskrag wat in geloof self lê. Nie omdat geloof op sigself iets kragtigs is nie, maar omdat dit gerig is op God, wat alle dinge moontlik maak.
Die evangelie versprei uit ’n klein saad
’n Mosterdsaadjie is een van die kleinste sade in die antieke wêreld, maar dit groei tot ’n boom waarin selfs die voëls nesmaak, soos die Here Jesus dit in Lukas 13:18–19 beskryf. Hierdie eenvoudige, alledaagse beeld dra ’n hemelse les dat ware geloof klein begin, maar oneindige moontlikhede het. Want, dit rus op God se beloftes.
Wanneer ons die koninkryk van God en die evangelieboodskap aan kinders of nuwe gelowiges oordra, voel dit dikwels soos ’n geringe taak — soos om ’n klein saadjie in die grond te steek. Maar dit is juis daar waar die wonder lê.
Die eenvoudige handeling van ’n mens wat ’n enkele saadjie neem en dit in sy tuin gooi, is ’n treffende beeld van hoe die evangelie versprei word. Dit is nie in menslike krag of status wat die koninkryk groei nie, maar deur die stille getrouheid van gewone gelowiges wat die Woord saai. Sonder tierlantyntjies, sonder bedekking van goudblaar, sonder die soeke na indruk.
Die evangelie is die saad wat geplant word
Die evangelie moet in sy eenvoud geplant word, net soos dit is, want dit is die evangelie self wat groei, nie ons weergawe daarvan nie.
Wat geplant word, moet egter wérklik die evangelie wees, nie ’n filosofiese afleiding of morele raad nie. Die boodskap van Christus, gekruisig en opgestaan, is die lewende saadjie wat lewe voortbring.
Net soos ’n mosterdsaad verskil van ’n klont was, al is hulle ewe klein, dra die saad lewe in hom. En só het die eenvoudige waarheid dat “Jesus Christus in die wêreld gekom het om sondaars te red,” die krag om harte te verander, lewens te vernuwe en ewige verlossing te bring.
’n Saadjie moet in die grond val; dit moet sterf aan sigself, maar daarin lê die begin van lewe. Net so moet die evangelie diep in die hart van die mens ingaan – onverkort, suiwer.
Hierdie waarheid sluit aan by die belydenis van die kerk deur die eeue. Die Nederlandse Geloofsbelydenis stel dit duidelik in Artikel 24: “Hierdie ware geloof werk in die mens ’n nuwe lewe en maak hom ’n nuwe mens, wat sy lewe heilig en vroom begin inrig.”
Geloof is lewendig
Geloof, hoe klein dit ook mag wees, is lewend omdat dit ’n gawe van God is, ’n middel waardeur Christus self en al sy weldade aan ons toegeëien word. Dit groei nie in afsondering nie; dit het die tuin van die hart nodig, die water van die Woord, en die lig van die Heilige Gees.
Maar die groei – die wonder daarvan – is die werk van God alleen. Soos ’n saad nie deur menslike wil begin groei nie, maar deur die Skepper se lewegewende krag, so is ook die geloof wat tot vrug lei ’n goddelike wonder.
Hoe lyk die groei van die evangelie?
Die eerste tekens van die groei mag onbenullig lyk: ’n kind wat vrae vra oor Jesus, ’n jong mens wat begin bid, ’n sondaar wat die eerste keer skuld erken. Ander mag spot, of sê: “’n Kind se trane lê naby die oppervlak,” of “Hy is maar maklik beïnvloed.” Maar vir die een wat werklik glo, is elke teken van lewe ’n rede tot hoop.
Die een wat waarlik lief is vir kinders, sal hulle nie geringskat nie, maar waaksaam wees vir elke spruit van genade wat opkom.
En dan word die mosterdsaadjie ’n boom. ’n Boom van rus, skaduwee, voedsel, en blydskap. Dit wat onbeduidend gelyk het, word tot ’n skuilplek vir ander. So is daar talle verhale van gelowiges wat, deur ’n eenvoudige woord van waarheid, “Kyk na Jesus” verander is, en wat op hulle beurt gemeenskappe, gesinne, en selfs nasies beïnvloed het.
Wanneer ’n mens tot bekering kom deur die eenvoudige evangelie, verander dit nie net sy eie lewe nie, maar dit maak hom tot ’n instrument van God se genade in die wêreld.
Die invloed van geloof is dikwels onberekenbaar. Wie sou kon dink dat die eenvoudige onderrig van ’n kategese-onderwyser of ’n moederlike vermaning die begin kan wees van generasies van gelowiges, van sendingbewegings, van predikers, of van opregte Christelike arbeid onder armes en verlorenes? Die takke van daardie mosterdboom reik ver.
Gelowiges moet geloof saai
As sulke ewige vrugte spruit uit so ’n klein saadjie, hoe verantwoordelik en geseënd is elkeen wat geroep is om te saai! Selfs wanneer daar min hoop is in die wêreld, selfs wanneer dit lyk of die evangelie minder verkondig word, bly die opdrag dieselfde: saai.
Moenie die saadjie agterhou nie. Al het jy net een, saai dit, want as dit groei, dra dit ’n honderdvoudige vrug. Die saadjie van die evangelie is van God gemaak; geen mens kan so iets skep of vervang nie. Dit dra in hom die hele lewe van Christus, en al die beloftes van God.
Daarom, wees getrou. Moenie moeg word om in kinders se harte die saadjie te plant nie. Moenie skaam wees vir die eenvoud van die boodskap nie. Jy hoef dit nie mooier te maak of met slim woorde te verpak nie.
Die saadjie is genoeg, want dit is lewend. En as God dit seën, sal dit groei. Nie altyd onmiddellik sigbaar nie, maar onkeerbaar en kragtig. Wat klein begin, eindig in lofliedere wat tot in die hemel weerklink. En wat is méér werd as dit?
Lees hier hoe om die mosterdsaad op sosiale media te saai:
